Susana García, concelleira de Educación de Ordes, fixo onte entrega dos diplomas do curso de ESO para persoas adultas. Nesta ocasión foron arredor de 30 alumnas e alumnos os que concluíron o curso iniciado no pasado mes de outubro. En total foron máis do 80% os que superaron as probas finais realizadas no pasado mes de maio. Analizando por áreas a científico-tecnolóxica foi a que alcanzou un maior número de resultados satisfactorios cun 90%, mentres que as de lingua e sociais se situaron nun 80%.
No acto de entrega Susana García felicitou a todas e todos os alumnos e animounos a continuar coa súa formación. De feito, tras acadar o título oficial de graduado en Secundaria, xa son moitas e moitos os que solicitaron a súa praza en ciclos de Formación Profesional dentro das ramas de enfermería, cociña ou administrativa.
